auf da strossn troffn

a fleißiger bursch

er woar scho a fescher,
friacher.
do san earm olle noch,
de weiber.

und hackln hot er kennan,
a fleißiger bursch.
und händt hot er ghobt!

zuapockt hod er
und gnumman hod er,
wos hoid grod do woar.

und a gaudi homma ghobt
mit earm,
im wirthaus,
wast eh.

heit liegt er hinterm stodl
und soarcht si au.

wos sui ma mochn,
is hoid a so.

augrennt

ob er wo augrennt is,
hob i earm gfrogt.
weu bloss weu der a neger is,
is er no ka schlechta mensch ned.
schaama suit er si geh,
hob i earm gsogt,
weu unser neger is da fleissigste
den wos ma hobn.
kaun er si wos oschaun vo eram,
hob i earm gsogt.
und schnölla hackln sui er sunst
hau i earm ausse.

da häxler

in häxler hod er earm eineghaut, sogns.
so a häcksler vo vogt, waast eh.
na, ned so a klana, so a riesn maschin.
hunderfuffzig ps oda so, a wahnsinn.
na, beim logahaus hod er earm kaaft.
mechat ned wissen wos der kost hod.
na, gfunden hobms earm ned.

da saubauer-toni

da saubauer-toni
woar scho a scheena trottel.
zearscht hod as gheirat
und noch dem hod a si scheiden lossn.
owa daun hod as no amoi gheirat,
de flitschn.
späda is jo sie gaungan.
heit homm ma earm eigrobn.
owa is essen woar guat.

daschlogn

host as a scho gheart?
da sepp hod sein voda daschlogn
mit an huizscheit.
i hob jo scho imma gwusst,
dass der ka guada is.
gestern hobms earm ghuit.
i frog mir nur
wer jetzt meine baam schneidt,
im herbst.
weu des hod er scho guat gmocht,
da sepp.

de leberkaassemmi

an nega hod er jetzt angstöd,
stö da des vua.
so an echtn.
waast eh,
so wirklich gaunz schwoarz.

gestern hob i earm troffn,
beim fleischhocka untn.
hod a si a leberkaassemmi ghuit,
und griasst hod er a.

genau gsegn

na hea ma auf mit dera!
de redt ma zvü,
und neigierich is aa.
gestern earscht hob is wieda gsegn
wias mid ihrn hund gongan is.
und überoi bleibt’s steh,
und schaut eini:
in goarten und in de fenster,
genau hob is gsegn.
und da hund,
wos den überall äusserln losst!
do kennts kaan scheniera ned.
owa aufklaubn duats ois,
des muss man ihr scho lossn.
owa daun hauts as in mistkiwi eini,
in den beim fleischocka vurn!
genau hob is gsegn,
na, des is jo koa oart ned!
und reden tuats,
i sog das:
dera ihr goschn,
des sog i da,
de muass ma moi extra daschlogn.

im grob umdrahn

wos da bua ausm hof gmocht hod,
da voda tad si im grob umdrahn.

in kugarutz hot a weg,
stö da des vuar,
und baam hod a pflonzt.
nussbaam.
des hots no nia gebn bei uns.

na wia de leicht wochsn suin,
hob i earm gfrogt.
wos a leicht glaubt wos a da duat,
hob i earm gfrogt.

na wos der herumgschissn hod
mit seina bewässerung,
mit de schleich,
wos des ois kost hod.

da voda tad si im grob umdrahn.

und nocha hod er no mehr hektar kaaft.
na fia wos, hob i mi gfrogt.
wer kaaft denn des,
de bledn nussn?

und a halle hod a higschtöd,
so a riesen trumm aus de panöö.
na vü zgross, hob i ma docht,
des braucht jo ka mensch ned,
hob i ma docht.

da voda tad si im grob umdrahn.

do hob i earm gfrogt fia wos des sei sui.
do hod a nur glocht und hot gsogt:
fiarn schnops koarl, fian schnops.

und gestern sans kumman,
mit de lkw mit de hänger.
da hob i earm gfogt, wo de leicht hifoarn.
noch fronkreich, hod a ma gsogt.

da voda tad si im grob umdrahn,
woan der des wissat.
weu kämpft hot er gegn earna,
friacha im kriag.

owa schau.
wos da bua ausm hof gmocht hod,
ollahond, ollahond.

owa i muass weida, de hendln fiardan,
griaß di gott.

is haus vakaaft

host scho gheart
wem er is haus vakaaft hod?
na, oiso bei ollem wos recht is,
owa des hed i ma ned docht vo earm.
i hob jo eigentlich nix gegen de,
owa suin bittschee bleibn wos highearn.
muas hoid gnua göd zoid hobm,
weu an weana hed a sunst de hittn ned vakaaft.

ned in da kirchn

heit woars scho wieda ned in da kirchn.
mechad wissn, wos so wichtig sei kau,
am sunntoch in da frua. owa,
geht mi jo eh nix au.

wengan gschroppn konns jo ned sei,
weu der is jo eh scho furt.
hackln tuats jo a nix mehr. owa,
wos was i.
kraung konns jo a ned sei,
hobs jo no gsegn gestern.

wird hoid scho wieda pipperlt hobn aufd nocht.

i wü jo ned schlecht redn, owa
seid da oide vo ihr hii is,
is sie a nimma gaunz do.

neinzger

in neinzger hod er gfeiert,
letzte wochn.
a stuizes oita.
ausm bett kummt er hoid nimma
ausse, so wia friacha.
sei rumänin hod kocht.
owa guad woars,
trotzdem.

nimmer einig

na, de zwaa werdn si a nimmer einig
in dem lebn.
de ane motschgert ollaweu über den hund
von da an, und de ondare über ois ondare.

wos interessierts mi wo sie de hundstrimmal hituat?
solongs as ned vua mei gschäft haut is ma des wurscht.

de ane kummt wenigstens no in mei geschäft eini,
damits a wurscht kaaft fia ihr viecherl.
is zwoa ned vü,
owa da hund is eh scho so blad.

olaweu

na, de gaunze sunn olaweu,
des is scho zvui.
owa regnan dearfs a ned,
jetzt nu ned,
weu i muas no is hei mochn.
owa de hitz olaweu,
na, des is scho zvui.
und schwitzn dat i,
olaweu.
wauns doch bloss köda wurad,
muargn.
owa regnan dearfs no ned,
weu is hei muas i no mochn,
vuarher.

schee woars

schee woars, und so feierlich.
de kostlerin hob i wieda moi troffn,
is scho long her gwesn,
dass i de gsegn hob.

und ihr mau is jetzt auf da gmoa augstöd,
gott sei dank.
wos der scho fia a pech ghobt hod
im lebn.

aso jo,
na gwaant hods scho vü,
de hanni,
weu ochtavierzg is jo ka oita ned.

owa scheene griaß von da kosterlin
sui i da sogn.
schod, dasst ned dabei worst.

so neigierich

geh, hear ma auf mit dera!
de is so neigierich,
am liabstn tats sa si in mei speis einihockn,
damits siecht wos i iss.

gö, daisii?
des maanst aa, gö?

de glaubt i merks ned,
wias ma nochschaut.
daweu miassats auf si söwa schaun.
wias bei dera ausschaut im hof!
na kaa wunder,
dass einfasüchtig is auf uns.

gö, daisii?

seit zwa wochn scho hots nimma kehrt.
durt schauts aus,
is grausn kennt an kumman.
i sogs da.

kumm daisii,
mia gengan jetzt zum fleischhocka,
kriagst a wurschti.

wo er herkummt

na, i waas des wirkli ned.
des hod a ma ned gsogt.

jo, wir hobn hoid ned gredt drüber.
is ma jo a wurscht.

glaubst? hob i no nia gheart.
wo sui des sei?

uganda host gsogt?
maanst?
geh, des host da grod ausdocht.
uganda.

geh, peppi, hüf uns.
wo kummt er denn her,
unser neger?

waast eh wen i maan?

naa, vo wo dass er is wü er wissn.

aso, aus linz is er.
nau.

wo er steckt

na, i waas a ned wo mei mau steckt.
mitn huaberer wuit er huiz mochn geh.
woahrscheinlich hobm sa si wieda vasoffn,
kennst as eh, de mauna.

owa, i sog da wos.
der kau ma jetzt amoi gstuin bleibn,
weu i foar heit zur kostlerin ind stodt.
daun konn er schaun wers earm kocht,
seine kaaspressknedln.

zuagsperrt

da hofer hot jetzt a zuagsperrt.
ewig schod um sei gschäft.
bin jo immer gern higaungan,
homm uns guad vastaundn.
owa teira woar er hoid scho
wia da hofer drübn in da stod.

jh 2026